NAGA CITY- Ikukundusir sa siyudad nin Naga an Flores de Octubre Flower Festival and Competition sa maabot na Oktubre 26, 2025.
Sa entrevista kan Bombo Radyo Naga ki Diosdado Ador Jr, President kan Pacol Flower Association, sinaysay kaini na sa nasambitan ng aktibidad sampulong team na igwang kanya-kanyang pangaran an maralaban-laban para sa pinakamagayon na pag-aarange nin burak.
Sigun ki Ador, igwang itataong premyo sa manggaganang team kaya piglalaoman na mas magigin exciting an nasambitan ng event.
Igwang pito na klase kan burak an gagamiton kun saen 70% digde an gikan sa mismong Pacol Flower Farm. Pig-orgulyo man kan opisyal na ini an enot na pagkakataon na isasagibo an Flores de Octubre makalihis an pandemic pirang taon na an nakakalihis.
Mientrastanto, dakula man an pasasalamat ni Ador sa lokal na gobierno kan siyudad nin Naga huli sa suporta kaini sa saindang aktibidad.
Katakod man kan nasambitan ng okasyon, pig-aabisuhan an publiko na rumdumon an direksyon kan trapiko asin an temporaryong parking spaces o paradahan tanganing malikayan an pagbungkaras kan mga problema.
Sa ngunyan, hagad na sana kaini an suporta kan gabos para sa lokal na mga burak asin artists.
