NAGA CITY-Mahigot an ginibong “flushing operation” kan Bureau of Fire Protection (BFP) sa ciudad nin Iriga para mahale an makapal na abo hale sa Mayon volcano na nakakaapektar ngonyan sa nasambitang lugar asin sa iba pang banwaan sa 5th district kan Camarines Sur.
Sa entrevista kan Bombo Radyo Naga ki FO2 Roldan Mark Bona, sinaysay kaini na ginamit ninda an saindang mga firetruck para i-flush o basaon nin tubig an mga tinampo asin atop nin mga harong, establisyemento asin mga istrukturang napatos nin ash fall.
Sigon sa opisyal, mahigot nindang pigpapagirumduman an mga residente na dae sigidon pasiring sa mga drainage canal an natipong mga abo huli ta bako suboot ining arog kan mga alpog.
An volcanic ash suboot posibleng magbara sa mga kale kaya man maninigo na ibugtak ini sa container asin dae iapon sa kun saen saen sana.
Prayoridad man kan BFP na malinigan an mga mayor na tinampo para makalikay na igwang mangyaring aksidente dara kan pagbaba kan visibility sa mga tinampo.
Nagtao man nin abiso si Bona sa mga residente na dae muna magparaluwas sa saindang mga harong ngonyan na dae pa dagos na nawawara an ash fall huli ta pino suboot an abo asin posibleng masinghot na peligroso sa salod kan tao.
Sigon man sa nagkapirang residente, sa nakalihis na 20 taon kan huring naka-eksperyensya nin ash fall an ikalimang distrito kan probinsya, ngonyan na taon na suboot an pinakamalala.
Napag-araman na nanao na tulos nin mga face mask asin bulong an City Disaster Risk Reduction and Management Office (CDRRMO) para sa mga taong posibleng makamate nin pagpiot nin daghan asin iba pang maga epekto sa salod kan nasambitang abo.
Apwera sa Iriga, nairehisto man an ash fall sa Buhi, Bato, Balatan, Bula, Baao asin Nabua.
