NAGA CITY- Pigtawan duon kan sarong private lawyer na an force termination o tolos na pagsipa sa trabaho an dae pwedeng gibuhon kan sarong employer sa saiyang empleyado.
Sa entrevista kan Bombo Radyo Naga ki Atty. Rolando Dela Cruz, private lawyer, sinaysay kaini na kinakaipuhan na dapat na pirmeng pairalon an due process.
Boot sabihon, pirmeng igwang bastanteng rason sa pagterminate sa sarong obrero asin nag-agi sa hararuman na imbestigasyon.
Katakod kaini, sigun pa ki Dela Cruz, igwang duwang notice rule, enot an pagtatao nin memo kun saen nakapalaman kun ano an kasalan kan sarong empleyado asin pighahagadan nin written explanations dapit sa partikular na offense.
Panduwa an action kan management, digde soboot nakapalaman kun ano an gigibuhon kan kompanya, kung hahalion an empleyado o akuon an saiyang explanations.
Pigtawan duon pa kan nasambitan ng abogado na kaipuhan pirmeng tawan nin tsansa an saindang mga obrero tanganing magin patas an pagpapairal kan ley asin komo pagrespeto sa derechos kaini.
