NAGA CITY – Nagkondusir an Family Planning Organization of the Philippines(FPOP) Camarines Sur Chapter nin Sexual Health Reproductive Medical Mission (SHRMM) sa Barangay San Pedro, Iriga City.
Sa entrevista kan Bombo Radyo Naga ki Jizele Regalado, FPOP Camarines Sur Chapter Volunteer, sinaysay kaini na sarong non-stock non-profit organization an saindang organisasyon kun saen an saindang obheto magtao nin mga serbisyo manunungod sa mga karapatang sekswal asin reproduktibo.
Dugang pa ni Regalado sa bilog na Pilipinas igwa sinda nin 12 aktibong chapter, asin 18 community chapter clinics.
Sa enterong Bicol Region man, igwa sinda nin tolong chapter kun saen an mga ini yaon sa Camarines Sur, Masbate, asin Sorsogon.
Sa Camarines Sur, igwa nin duwang chapter community healthcare clinic kun saen saro an nakabase sa Naga sa parte kan Barlin Street, mantang an saro an yaon sa Pili, sa may Cadlan. An sainda man na Respond Project sarong programa nin family planning kun saen an founder ninda para igdi gikan sa ibang nasyon.
An Australian Aid an major sponsor o funder kan nasambitang proyekto, kaibanan an family planning sa pagtao nin mga serbisyo manunungod sa sexual reproductive health.
Nagkondusir man soboot sinda nin sexual reproductive health medical mission kun saen saro sigun igdi sa target kan saindang proyekto an makatao nin mga serbisyo orog na sa mga pinaka-vulnerable partikularmente sa mga komunidad o lugar na dai masyadong inaabot nin mga serbisyo.
Nauugma man ini na nakaabot sinda sa San Pedro, Iriga City kun saen nagkaigwa sinda nin 90 partisipantes na natawanan nin serbisyo asin nagkondusir man soboot sinda nin mga lecture siring kan family planning, maternal asin child care, asin iba pa.
