Iprinesentar na sa publiko kan National Bureau of Investigation an limang indibidwal na nadakop kaini huli sa suboot pangilkil ki dating House of Representatives Speaker Martin Romualdez.
Sa press conference, Positibong pigheras ni Bureau of Investigation Director Atty. Melvin Matibag an matrayumpong pagkadakop kan mga ini.
Kabali sa mga nadakop iyo an online media network personality na si Franco Mabanta, an kagmukna kan Peanut Gallery Media Network.
Base sa impormasyon, an Organized and Transnational Crime Division kan Bureau an nangenot sa entrapment operation na nagin dalan kan pag-arestar ki Mabanta.
Segun kay Director Atty. Matibag, posibleng mahampang ini sa kasong Robbery (Extortion) katakod sa pagbalgar sa Republic Act No. 10175 o Cybercrime Prevention Act of 2012.
Durante kan imbestigasyon, tinakot suboot ni Mabanta si Leyte 1st District Rep. Romualdez sa paagi nin tagapag-ultanan na magpaluwas nin video na pinipirit an opisyal sa isyu nin korapsyon.
Sinabi niya na mahagad siya nin P300-M karibay kan dae pagpaluwas kan video, na pwedeng bayadan nin apat na hulugan na tig-P75-M an kada saro.
Basado sa narecibeng reclamo, nagsagibo nin entrapment operation an bureau makalihis na iareglo an paghatod kan enot na tranche kan bayad asin sa kahurihurihi inarestar si Mabanta asin iba pa.
Alagad, pinahimutikan kan mga naarestar na media personalities an mga alegasyon asin nanindugan na inosente an mga ini.
Sa ibong kaini, piglinaw ni NBI Director Matibag na dae nangangahulugan nin pag-atake sa press freedom an saindang pagdakop.
Pig-eksplikar kaini na nakasentro an bureau sa kriminalidad asin bako an mga opinyon an sentro kan imbestigasyon.
Dugang pa kan director na padagos nindang iimbestigaran ini tangarig na madeterminaran an manlaen-laen na anggulo na imbwelto sa iligal na aktibidad.
