Nakabinbin pa man giraray an pagheheras kan Department of Transportation (DOTr) nin fuel subsidy sa mga apektadong sektor huli man sa paghiro kan presyo nin produktong petrolyo.
Sa Malacañang press briefing, sinaysay ni DOTr Secretary Vince Dizon, ipapautob sana ninda an pagheras kan nasambitan ng fuel subsidy oras na mag abot sa 80-dollar kada bariles an presyo kan langis sa world market.
Sa ngunyan kaya, nagbaba na sa 69 dollars kada bariles an presyo kan langis na harayo sa 78 dollars per barrel kan nakalihis na mga aldaw huli pa sa tensyon sa Middle East.
Siringpaman, pigsierto ni Dizon sa sektor kan transportasyon na preparado an gobyerno na tulos iheras an subsidiya sa oras na maabot an pigtalaang presyo kan langis.
Sigun ki Dizon, pigkakarkulong maabot sa 1,132,407 an kabilogang benepisyaryo kan nasmabitan ng programa, na kinababalihan kan 258,712 public utility vehicles (PUVs), 723,695 tricycle drivers, asin 150,000 delivery riders.
Plano man na tawan nin ayuda an mga driver kan TNVS na tatabangan man sa paagi kan Department of Communications Technology.
Iheheras ini sa paagi kan Pasada Cards o Fuel Cards, transfer e-wallet accounts, bank transfer, o cash distribution tangani tulos na makaabot sa mga benepisyaryo.
