Pigpreparar na kan Department of Energy (DOE) an fuel subsidy na kakaipuhanon kan mga parasisira asin magin kan mga public utility vehicle (PUV) drivers enkaso man na nagsipa sa $80/barrel an magigin presyo kan krudo asin kan petrolyo kawsa kan naglalalang tensyon sa pagultanan kan Iran asin Israel.
Sigun ki Energy Officer-In-Charge Sharon Garin, nakakapag-trigger kan sabsidiya an nasambitan ng presyo kun saen igwa nang nakatagama para sa Department of Transportation (DOTr)na iyong iheheras sa mga tsuper asin magin sa Department of Agriculture (DA) na iyo man iheheras para sa mga parasisira.
Inabisuhan na man soboot kan saindang ahensya an mga sekretaryo kan nasambitan ng mga departamento para sa pagpreparar kan fuel subsidy komo tawid pasada sa mga PUV drivers asin tangani magin dagos-dagos man an hanap-buhay kan mga parasisira.
Kasunod kaini, kinumpirmar man kan opisyal na nakatalaan na mag ulay an saindang mga ahensya tangani pagprepararan an nilalaomang paglangkaw nin presyo sa mga produktong petrolyo.
Pag-uulayan sa saindang meeting kun gurano pa an natatadang pondo para sa pagpreparar kan fuel subsidy, kun anong mga programa pa an pwedeng gibuhon kan saindang mga departamento tangani makatabang sa mga pilipino.
Plano man kan departamento na makipagkoordinar asin mag apelar sa manlaen-laen na mga fuel companies para man sa pwedeng pagtao nin discount sa mga tsuper tangani makapagtao nin dawa kadikit na tabang enkaso sobrang maglangkaw an presyo tangani maibitaran man an dagdag pasahe sa mga commuters.
