NAGA CITY – Dae mauntok an mga otoridad sa paghahanap sa puganteng si Pastor Apollo Quiboloy asin apat pang kapwa akusado.
Pigsierto ni Interior and Local Government Secretary Benhur Abalos Jr. na gagamiton kan gobierno an gabos kaining resources madakop sana si Quiboloy asin iba pa na nahahampang sa mga kasong human trafficking asin child abuse.
Sigun ki Abalos tutugison sinda Quiboloy kan pulisya, militar asin iba pang law enforcement agencies katuwang an publiko. Katakod kaini, padagos an pangapodan ni Abalos ki Quiboloy asin iba pang akusado na magsuko na asin hampangon na sana an mga kaso sa korte.
Enot nang nagpahayag kan kumpyansa si Abalos na madadakop na an mga suspek sa orog na marekas na panahon huli ta padiit-diit nang nagsasadit an kinamomogtakan asin saindang pig-hihiroan.
Si Quiboloy an igwa nin patong sa payo na ₱10 milyon mantang an mga kapwa akusado kaini na sinda Cresente Canada, Ingrid Canada, Jackielyn Roy asin Sylvia Cemañes man an igwa nin tig-sasarong milyong pisong pabuya sa isay man na makakapagtukdo kan kinamomogtakan kan mga ini.
