Nangapudan si Senador Sherwin Gatchalian kan tolos na pagsimbag asin masusing safety audit sa mga apektadong lugar makalihis an 7.6-magnitude na linog na nagyugo-yugo sa Davao Oriental asin kataid na probinsiya kasubagong aga.
Pigpapahiro kan senador an National Disaster Risk Reduction and Management Council (NDRRMC), local disaster councils, asin first responders, tanganing masierto an tolos na pagsagibo kan search, rescue, asin relief operations.
Pinapahiro man tolos an mga magkakanigong ahensya na magsagibo nin safety inspections sa mga ospital, eskwelahan asin mga lugar na dakula an numero kan populasyon.
Pigtawan-duon man kaini an pangangaipuhan na proteheran an mga kaakian, na saro sa mga pinakaapektado enkaso igwang kalamidad.
Pigsaysay ni Gatchalian an mga report na pirang estudyanteng nakamate nin pagkalula sa kasagsagan kan pagyugo-yugo kaya importante soboot magtagama nin psychosocial support sa mga eswekalahan tanganing matabangan sindang malampasan an takot asin trauma.
Nangangapudan man si Gatchalian sa publiko na imantenir na magin alerto asin magkasararo sa pagsierto nin kasalbaduhan kan kada saro mantang padagos an pagresponde kan mga otoridad sa danyos na kawsa kan makusog na linog.
