Mantang pinag-aadalan kan bagong liderato kan Philippine National Police (PNP) kun kinakaipuhan pa nin bagong spokesperson para sa organisasyon.
Ipinaliwanag ni acting PNP Chief PLt. Gen. Jose Melencio Nartatez Jr. na sa antas kan chief of police, an mismong hepe kan istasyon an dapat magtaram para sa saiyang nasasakupan.
Sa provincial level man, an provincial director an may awtoridad na magtao nin pahayag o an itinalagang spokesperson kun mayo ini.
Siring man an sistema sa regional offices. Para man sa National headquarters, sigun ki Nartatez, an chief PNP asin man Public Information Office (PIO) an mayo na mataram para sa organisasyon.
Mientrastanto, kinumpirmar ni PIO Chief PBGen. Randulf Tuaño na mantang mayo pang opisyal na spokesperson ini na muna an masirbing tagapagtaram kan Pambansang pulisya kun mayo o dae available magtaram sa media si Gen. Nartatez.
Susog ki Tuaño mawot kaya ni Gen. Nartatez na gikan sa Public Information Office an spokesperson kan PNP. Buot sabihon dae na magigin tagapagtaram kan PNP si PBGen. Jean Fajardo na ngunyan an nakatalaga na sa Directorate for Comptrollership.
Napagaraman na si Gen. Fajardo an nagsirbing tagapagtaram kan PNP magpuon 2022 o kan ika-27 PNP Chief na si Gen. Dionardo Carlos, hasta ki dating PNP Chief General Rodolfo Azurin, Gen. Benjamin Acorda, Gen. Rommel Francisco Marbil asin man panghuri ki Gen. Nicolas Torre III.
