Aram baya nindo mga ka-bombo, an Ghazipur Landfill na bistado man sa apod na Garbage Mountain kan Delhi an pigmirar komo World’s Highest Garbage Mountain.
Ini an igwang sukol kan kadagaan na nag-aabot sa 70 acres o nasa 50 football field asin haros kalangkaw kan pamosong Taj Mahal.
An nasambitan ng landfill an naistablisar kan taong 1984 sa Ghazipur, eastern district kan Delhi.
Naabot kan Ghazipur Landfill an maximum capacity kaini kan 2002 alagad padagos na nahihilingan nin paglangkaw hasta nakakriar na nin sararadit na bulod na nagpapakol sa langkaw na 72 meters.
Dati na ining pigbisto komo pinakadakulang landfill sa bilog na kinaban alagad padagos na nakakareseber nin tone-tonelada na basura sa Delhi kada aldaw asin padagos na piglaoman pa na madudugangan ini sa mga masunod na panahon.
Sa presente, pigbibibilog na ini kan nasa 14 milyon na metriko toneladang basura na gikan man sa milyon na tawo sa lugar.
Huli kaini, an masangsang na parong gikan sa landfill an padagos na nagigin problema kabali na an kadalasan na pagbungkaras kan kasulo siringman an pagrasay kan basura na minsan igwang natatalbungan na mga tawo o behikulo.
