Naghahanap nin mga paagi an Department of Health (DOH) tangani gibuhong ganap na gumagana an mga inaapod na “ghost” o non-operational health center komo parte kan padagos na paghihinguha na pakusugon an pangenot na sistema kan pag aataman sa salud kan bilog na nasyon.
Sa sarong pahayag kan nakalihis na Martes, sinaysay ni DOH Secretary Teodoro Herbosa na presente nindang isinasagibo an audit sa mga health facility sa bilog na nasyon tangani matukoy an mga naitugdok alagad dae pa nagagamit o dae nagamit huli man sa kakulangan kan mga tauhan, kagamitan, o tamang accreditation.
Sigun ki Herbosa, 70 porsiyento sana kan 600 center na itinugdok sa irarom kan Health Facilities Enhancement Program an presenteng gumagana.
Paliwanag kaini, alinsunod sa kasunduan sa DOH, an mga local government unit (LGU) an may paninimbagan sa pagkua nin mga kawani na mapadalagan kan mga health center.
Pwede man ining i-tap huli ta may national health workforce system an DOH, siring na sana kan Doctors to the Barrios (community doctors) program.
Dugang pa ni Herbosa, posibleng padalaganon kan DOH an mga health center sa paagi kan saindang mga personnel, basta igwa nin kasunduan sa mga mayor na dae ini mapadalagan huli sa personal services cap.
Saro pa sa mga opsyon, sigun ki Herbosa, iyo an pakikipagtabangan kan DOH sa pribadong sektor tangani mapagana an mga nasambitan ng pasilidad.
