Natapos na an kampanya kan Gilas Pilipinas sa FIBA Asia Cup 2025 makalis na tambakan sinda kan Australia sa iskor na 84-60.
Sa primerong quarter pa sana, dominado na kan Boomers an kawat 29-12 sa kawat na pigkundusir sa King Abdullah Sports City sa Jeddah, Saudi, Arabia.
Nadepensahan man kan world number 7 si Justin Brownlee kaya nadipisilan ining makapuntos.
Pinirit pa kan Gilas na mahabol an puntos alagad labi sindang nasakitan asin man dae na napantayan an mayo pang daog na Boomers.
Ini na an pantulong beses na nabigo an Gilas Pilipinas na makatungtong sa semifinals kan FIBA Asia Cup makalihis na back-to-back na runner-up place ninda kan taong 2013 sa Manila asin 2015 na pigkundusir man sa Changsha, China.
Nagin dakulang hamon man ngunyan sa Gilas an kawaran ninda Calvin Oftana asin man Cjay Perez huli sa ankle injuries na saindang natamo kan mga naenot na kawat.
Nasayang an nagibong 17 points ni Kevin Quiambao, 15 points man ki Dwight Ramos asin 10 points an nairehistro ni Brownlee.
