Sarong makusog na pwersa an pinakawaran kan Gilas Pilipinas sa second half tanganing itarak an 66-57 kapangganahan kontra sa Iraq asi masierto an ticket sa playoffs kan FIBA Asia Cup kasuodma sa King Abdullah Sports City sa Jeddah, Saudi Arabia.
Ini an enot na kapangganahan kan Gilas Pilipinas tanganing mag-angat sa 1-2 record sa Group D, bastante tanganing makalaog sa playoffs. Dikdikan an laban sa first half kun saen ribayan kan mainit na atake an Gilas asin Iraq.
Napuli sa 33-all an iskor sa pagtatapos kan enot na duwang kanto.
Alagad mainit an ratsada kan Gilas sa pagpupuon kan thirs quarter kn saen nagbandera sa matikas na kamada kan tropa si Dwight Ramos na nagpakawara nin back-to-back three pointers tanganing magrayo sa 41-35 an Pinoy cagers.
Nakatuwang ni Ramos sinda naturalized player Justin Brownlee asin Chris Newsome tanganing isarado an 15 puntos na kalamangan, 55-40 antes magpuon an huring kanto.
Pinorbaran na magpalag kan Iraq kan maglatag ini nin 10-2 run tanganing makadukot sa 50-57. Alagad ito na sana an nakayanan kan Iraq tanganing dagusan na makua kan Gilas an kapangganahan.
Nangenot para sa Gilas si Ramos na maghataw nin kabilogang 21 puntos kaibahan an limang rebounds, sarong assist asin sarong steal mantang nagdugang si AJ Edu nin siyam na puntos, pitong boards, tolong steals asin duwang blocks.
Nakalikom si Brownlee nin walong puntos, pitong rebounds asin apat na assist mantang igwang tig-anom sinda Jun Mar Fajardo asin Carl Tamayo.
Matindi an depensa kan Golas na nakakua nin siyam na steals tanganing mapuwersa an Iraq na makagibo nin 16 turnovers.
Sa playoffs, makakalaban kan Gilas Pilipinas an No. 2 team sa Group C na pigbibilog kan China (2-0), Saudi Arabia (1-1), Jordan (1-1) asin India (0-2).
