Maduon pinahimutikan ninda Senador Christopher “Bong” Go asin dating Justice Secretary Vitaliano Aguirre II an pagkakadawit kan kaibahang pangaran sa dokumentong iniluwas kan International Criminal Court (ICC) komo soboot co-perpetrators ni dating Presidente Rodrigo Duterte sa kasong crimes against humanity katakod kan war on drugs.
Sa iniluwas na statement ni Sen. Go kan nakalihis na weekend, inapod kaini an mga akusasyon komo mayong basehan, one sided, asin dae nagsasairarom sa saiyang tunay na tungkulin komo Special Assistant to the President kan taong-2016 hasta 2018 asin Executive Assistant kan Alkalde kan Davao City puon 1998 hasta 2016.
Pigtawan-duon kan senador na mayo ining anumang partisipasyon, kaaraman, o awtoridad sa mga sinasabing pagbalgar, asin pinahimutikan man kaining nagin Chief of the Presidential Management Staff ini.
Pighurot ni Go na matinir ining nakatuon sa saiyang tungkulin komo senador asin sa pagseserbi sa mamamayang Pilipino sa ibong kan soboot mga mayong basehang akusasyon.
Pinahimutikan man ni dating Justice Secretary Aguirre an anuman na partisipasyon sa soboot extrajudicial killings katakod kan kampanya kontra iligal na droga kan dating Presidente.
Paliwanag ni Aguirre na dae kaini sinuportaran asin mayo ining kinaaraman sa sinasabing mga paggadan.
Naaraman sana soboot kaini kan nakalihis na Setyembre 2025 na kaibahan an saiyang pangaran sa Document Containing Charges na isinumiter kan prosekusyon kan nakalihis na Pebrero 13, alagad mayo soboot ining dapat ikatakot asin preparado kaining hampangon an anumang kaso.
Pighurot man ni Aguirre na mayo nang hurisdiksiyon an ICC sa Pilipinas makalihis an pag-atras kan nasyon sa Rome Statue kan nakalihis na 2019.
Dugang pa kaini, kan ini pribadong abogado pa ni dating Presidente Duterte sa Davao, dae pa miyembro kan ICC an Pilipinas kaya dae kaini pwedeng usigon kun igwa man ining nagibong pagbalgar.
Komo Justice Secretary puon kan taon-2016 hasta 2018, sinaysay kaining ginampanan sana kaini an saiyang tungkulin.
Pigtawan-duon man kaini an saiyang nagin papel sa pagpapakarhay kan pag-uulay sa tahaw kan dating Presidente asin kan mga pamilya kan mga biktimang sinda Kian Delos Santos, Carlo Arnaiz, asin Reynaldo de Guzman, na nagresulta soboot sa pagsusunad nin kaso asin pagkakakulong kan mga pulis maimbwelto.
Apwera kina Go asin Aguirre, pinangaranan man komo mga soboot co-perpetrators si Senador Ronald dela Rosa asin iba pang dating haralangkaw na opisyal asin PNP officials kan nakalihis na administrasyon.
