Nagpatanid si dating Presidente Rodrigo Roa Duterte na kun dae kayang tawan nin linaw kan administrasyon an mga nagin deliberasyon sa prosopwestong budget para sa taong 2025, sasabihan soboot kaini an publiko na dae na magbayad nin buwis.
Sigun pa sa dating presidente, kun dae ini kayang tawan nin eksplenasyon, sayang soboot an ibinabayad kan publiko orog na kun dae aram kan mga ini kun saen napapaduman an kani-kanilang mga kwarta.
Bako man soboot tama na iwalat na blangko an pirang parte kan prosopwestong budget nin huli ta dae ini naaayon sa ley kan nasyon orog na kun ini an budget na aprubado kan pinakahalangkaw na opisyal kan Pilipinas.
Dugang pa ni Duterte, posible man soboot ining paggikanan kan mga iregularidad orog na kun pwedeng magpili an mga nasa opisina nin kantidad na mawot nindang dugangan komo reserba.
Enot na digdi, kun isay man soboot an nasa likod kan mga anomalyang ini an posibleng mahapang sa kadakol na legal consequences, saro na soboot digdi an pagkakakulong.
Pigtawan-duon pa kan dating presidente na dae madudulagan kan tawong ini an legal process asin huridikasyon kan korte huli ta mahiro an pagpapakarhay kan papeles sa laog kan nasyon.
Dae na kuta soboot ini gibuhon pa orog na kan mga opisyal na igwa pa nin plano na maglaog nin reserba para sa prosopwestong pondo.
