NAGA CITY – Nagpakol sa poco mas o menos apat na ektarya nin daga an naapektaran kan grass fire na nagbungkaras sa Libmanan, Camarines Sur.
Sa entrevista kan Bombo Radyo Naga ki Fire Officer 2 Ronel N. Beraquit, Fire Arson Investigator kan Bureau of Fire Protection-Libmanan, sinaysay kaini na nangyari an kasulo sa Barangay Candami sa nasambitan ng banwaan kun saen nasa 3 o 4 nin ektarya nin daga an nasulo.
Alagad hasta ngunyan, dae pa ninda natutukoy kun sisay an kagsadiri kan daga huli ta mayong tawo kun saen nangyari an insidente asin mayo man nin mga hararaning harong digdi.
Ini man an rason kaya dai ninda nakaulay an posibleng may kansadiri kaini o kaya an caretaker.
Purong grassland sana man an nasulo nin kadagaan, asin pinagtutubudan na igwa nin koneksyon sa naeeksperyensyahang halangkaw na heat index an pangyayari huli ta pirang grass fire incident naman an nairehistro sa banwaan.
Dugang pa kan opisyal, huli sa halangkaw na heat index, nakakaaralang an mga doot o damo sa palibot na marekas man na pigkakapitan nin kalayo. Huli digdi, nakiulay man si Beraquit sa publiko na likayan an pag-apon nin upos kan sigarilyo sa mga kaduutan asin pagsulo kan kan mga alang na dahon o awot tanganing malikayan an siring na insidente.
An pagsagibo soboot nin open flame na pagsusulo kadalasan na nagigin kawsa nin mga grassfire. Sarong ehemplo na pigtao kaini an paglinig sa mga ka-omahan kun saen pigsusulo an mga kaduutan, napapabayaan, na nagigin rason kan pagkalat kan kasulo kun saen may nadadamay nang kataraid na property.
