NAGA CITY- Pigkundusir ngunyan na aldaw an groundbreaking ceremony kan bagong Plaza Quezon Development Project sa siyudad nin Naga.
Sa nagin paghampang sa mga kagawad kan media ni Naga City Mayor Nelson Legacion, sinaysay kaini na pinaglalaoman matatapos an konstruksyon kan nasambitan ng building antes an pagselebrar kan Peñafrancia Festival sa masunod na taon.
Sigun sa alkalde, an budget na ginamit para sa nasambitan ng proyekto na nagkakantedad nin nasa P190-M an gikan sa budget na nakatagama man ki Senator Bato Dela Rosa.
Kasabay kaini, pigtawan duon ni Legacion na mayong nahiro na pondo an lokal na gobierno sa nasambitan ng proyekto kun kaya dakulang katabangan sa siyudad.
Dugang pa kan opisyal, an desinyo kan bagong Plaza Quezon Building an basado sa nahaman kan Camarines Sur Chapter Of United Architect of the Philippines.
An desinyo, repleksyon kan historya kan siyudad asin kun ano soboot an mawot na mahiling sa futuro kun kaya igwang halong moderno an design. Ini makakatabang tanganing mapa-uswag pa an turismo kan siyudad na makakatabang man sa lokal na ekonomiya.
Sa ngunyan, pakiulay na sana ni Legacion sa DPWH asin contructor na matapos an patrabaho antes an Peñafrancia Festivities tanganing magamit asin mapakinabangan na para sa manlaen-laen na aktibidad na ikukundusir.
