Nagsunad nin pormal na reklamo an nagkapirang indibidwal kaibahan an mga bishops, retired generals asin civil society leaders kontra sa presenteng chairman kan Commission on Elections na si Atty. George Erwin Garcia.
Kun saen, pigsunad an reklamo sa National Bureau of Investigation Anti-Fraud Division ngunyan na aldaw kontra ki Chairman Garcia asin siyan na iba pa.
Basado sa 15 dahong reklamong pigsumiter sa opisina, digde nakapalaman an akusasyon igwang naganap na pangingiaram sa transmission kan mga bito kan nakalihis na bulan nin Mayo.
Huli digde, pigsunad ninda an reklamong ‘system interference’ sa irarom kan Paragraph 4 (a) kan Republic Act 10175 o an Cybercrime Prevention Act of 2012.
Hurot kan mga complainants na ilegal soboot an ginibo kan Commission on Elections na ribayan an certified asin audited software program version na 3.4.0 sa Automated Counting Machines (ACMs) kan dae sertipikadong program version na 3.5.0.
Kaibahan man digde an alegasyon paglilinig o pag-delete kan nasa 5 milyon na boto sa vote discrepancy na sulamenteng COMELEC sana an naggibo nin mayong presensiya o partisipasyon kan maski na sisay sa 5 transparency groups.
Paglilinaw man kan mga nagpasiring sa opisina kan National Bureau of Investigation na dae ninda mawot sa pigsunad na reklamo na magsagibo nin ‘recount’ sa mga boto asin ‘nullification’ sa nagin resulta kan naganap na botohan.
Kaibaha sa mga nagsunad nin reklamo iyo sinda Atty. Alex Lacson, asin pati an Isabela Vice Mayor kan Reina Mercedes na si Atty. Harold Respicio.
Sa kampo man kan Commission on Elections, bukas soboot an komisyon para sa imbestigasyon mapadapit sa mga akusasyong piggagapo orog na sa nakalihis na eleksiyon.
