Nangapudan nin suporta an grupong Bantay Bigas sa gobyerno para sa mga paraoma tanganing matugunan an epekto kan Super El Niño sa produksyon nin paroy asin iba pang produktong agrikultural sa nasyon.
Sa intrevista kan Bombo Radyo Naga ki Cathy Estavillo, Spokesperson kan Bantay Bigas, sinaysay kaini na bakong supisyente an presenteng mga lakdang kan gobyerno tanganing protektahan an kabuhayan kan mga paraoma kontra sa grabeng tagtuyot asin iba pang kalamidad.
Segun ki Estavillo, dapat inoton kan gobyerno an pagtao nin tubig sa mga paroyan, siring man an pagpauswag kan mga sistema nin pag-imbak nin tubig-uran tanganing malikayan an pagka-aksaya kan suplay sa panahon nin tagtuyot.
Dugang pa kaini na kaipuahan na magpatupad nin konkretong mga lakdang tanganing masiguro an supisyenten asin importante na masiguro na mapakinabangan kan mga paraoma an tubig hale sa mga dam asin irigasyon tanganing maipagpadagos an pagtanom nin paroy.
Tinawan-duon kaini an pangangaipo na direktang bakalon kan gobyerno an paroy kan mga lokal na paraoma sa makatanusan na presyo, imbes na mas magsarig sa pag-angkat nin bagas hale sa ibang nasyon.
Kun sain makakatabang ini tanganing malikayan an pagkalugi kan mga paraoma asin masiguro an saindang kita, orog na sa panahon nin anihan.
Kinuwestiyon kaini an padagos na pag-angkat nin bagas mantang igwa nin mga lokal na paraoma na nag-aani, dugang pa na an dakulang volume kan imported na bagas pwedeng makaapekto sa presyo kan lokal na paroy, na posibleng magresulta sa mas hababang kita kan mga paraoma.
Nangapudan ini nin mas dakulang badyet para sa agrikultura asin irigasyon tanganing mapakusog an kakayahan kan nasyon na makatao nin supisyenteng pagkakan sa ibong kan mga kalamidad asin epekto kan pagbabago nin klima.
Mientrastanto, tigenkaminar kaini an mga paraoma, parasira, asin mga konsumidor na magsararo sa pagtulod nin mga polisiya na maprotektar sa lokal na produksyon nin pagkakan, masiguro an makatanusan na kita para sa mga prodyuser, asin mapreserbar an abot-kayang presyo kan mga panginot na bilihon.
Mientrastanto, kaipuhan an halawig na solusyon asin konkretong aksyon kan gobyerno tanganing maprotektaran an kabuhayan kan mga paraoma asin masiguro an seguridad sa pagkakan kan nasyon sa tahaw kan huma kan Super El Niño.
