Negatibo sa helang na tubercolusis si dismissed Bamban, Tarlac Mayor Alice Guo. Sinaysay kan Bureau of Jail Management and Penology (BJMP) na kan nakalihis na Lunes nagluwas an resuta kan sputum test ni Guo na isinagibo kan Quezon City Jail Laboratory.
Si Guo an na-diagnose na igwa nin impeksyon sa saiyang wala na baga sa pigsagibong medical examination sa PNP General Hospital antes ini an pigbalyo sa Pasig City Jail Female Dormitory kan Lunes nin pagkaaga.
Sa bagong kasuguan, pigkanselar kan Pasig Regional Trial Court (RTC) an pagdangog para sa urgent na mosyon na pigsunad kan kampo ni Guo tanganing magtinir ini sa PNP Custodial Center.
Pigsaysay ni RTC Branch 167 Judge Annieleyn Medes Cabelis na nakaresiber an korte nin impormasyon gikan sa Pasig City Jail na si Guo, “naka-commit na” sa female dormitory.
An Pasig Court an nagkakapot sa non-bailable qualified human trafficking complaints na pigsunad kontra ki Guo asin iba pang personalidad na pigsunadan kan Department of Justice (DOJ) manungod sa raided illegal Philippine offshore gaming operator (POGO) facility sa Bamban.
