Lininaw na kan Philippine Statistics Authority (PSA) sa Camarines Sur an rason sa likod kan padagos na halawig na pila para sa PhilSys o National ID registration, kasabay kan manlaen-laen na lakdang tanganing maparikas an proseso asin maabot an mas dakol na namamanwaan.
Sa intrevista kan Bombo Radyo Naga ki Raul Aspe, Chief Statistical Specialist Camarines Sur, ipinaliwanag kaini na limitado an kapasidad kan lambang registration machine. Sinabi niya na maabot sa 15 hasta 20 minutos an pagproseso kan biometrics asin demographic data kan lambang aplikante. Huli kaini, mga 50 sagkod 60 katawo sana an pwedeng akomodaron kada makina sa laog nin sarong aldaw, dawa 15 oras an operasyon.
Sa ngonian, apat na registration kits an nakadeploy sa syudad nin Naga, mantang walong mobile kits an naglilibot sa manlaen-laen na munisipyo sa probinsya. Alagad padagos an pagdagsa kan mga aplikante, lalo na an mga benipisyaryo kan Pantawid Pamilyang Pilipino Program (4Ps), na kinakaipuhan na magkaigwa nin National ID para sa saindang transaksyon sa Department of Social Welfare and Development (DSWD).
Nin huli sa mga deadline na itinalaan kan ibang ahensya, an ibang mga aplikante napipiritan na mag-camping out o magpalipas nin banggi sa luwas kan mga registration center tanganing maseguro na sinda magkakaigwa nin slot.
Tanganing masimbagan ini, pinapakusog kan PSA an pagrehistro sa mobile sa paagi kan programa na “PhilSys on Wheels”. Tuyo kaini na maabot an mga namamanwaan sa mga barangay, kaiba na an mga bed-ridden senior citizens asin mga residente sa mga harayong lugar. Sa ibong kaini, aminado an ahensya na limitado sana an numero kan mga registration kit huli sa kakulangan nin fondo asin output-based operation kaini.
Nakikipag-koordinar man an PSA sa mga lokal na gobyerno asin DSWD ngani na ma-streamline an mobile registration schedule asin maibitaran an pagdagsa sa mga sentro. Igwa man nin pigdesignar na mga special lane para sa mga persons with disabilities (PWD), mga senior citizens, mga bados, asin mga walk-in client para mamantenir an marahay na dalagan kan mga pila.
Mientrastanto, pig-esplikar kan PSA na igwa nin tolong porma nin National ID na parehas an validity: an pisikal na PVC card, an ePhilID na nakaimprenta sa papel na may QR code, asin an digital ID na makukua sa eGov PH application. Ineenkaminar kan ahensya an publiko na gamiton an arin man sa mga ini sa saindang mga transaksyon.
Inaabisuhan man an mga namamanwaan na ireport sa PSA an arin man na opisina o institusyon na habong mag-ako nin ePhilID o digital ID para sa tulos na aksyon.
An distribusyon kan mga pisikal na kard nagpapadagos, alagad an PSA nagrerekomendar kan paggamit kan digital na format para sa mas marikas asin mas kombenyenteng pag-access.
Sa kabilogan, 1,063 na barangay sa Camarines Sur an target kan mobile registration. An mga lugar nin pagparehistro bukas poon Lunes sagkod Sabado, poon alas 8 nin aga sagkod alas 5 nin hapon, dawa ngani ini parateng pinalawig depende sa bilang kan mga aplikante.
Pig-eengganyar an publiko na makipag-ulay sa saindang Local Government Unit (LGU) o municipal links para maaraman an mobile registration schedule sa saindang lugar, asin siguraduhon na kumpleto an mga kinakaipuhan na dokumento antes magpasiring sa mga registration centers para maibitaran an inconvenience.
