Nagsakat na sa 251 an bilang kan mga barko kan China na nanutaran sa West Philippine Sea huli sa mga militia vessels na nakapalibot sa namumugtakan kan BRP Sierra Madre.
Susog sa report kan Philippine Navy, may total na 251 na barko kan China Coast Guard (CCG), warship kan People’s Liberation Army-Navy (PLA-N) asin Chinese maritime militia (CMM) an nairehistro poon kan Setyembre 17 hasta 23.
An mga Chinese ship na naheling sa WPS iyo an 2 CCGs, 2 PLANs, 7 CMMs, 1 research ship sa Bajo de Masinloc; 9 CCGs, 62 CMMs, 1 research vessel sa Ayungin Shoal; 1 CCG, 23 CMMs, 1 research vessel sa Pagasa Islands; 3 PLANs sa Likas Island; 2 CMMs sa Panata Island; 16 CCGs, 11 PLANs, 55 CMMs sa Escoda Shoal at 18 CMMs sa Iroquois Reef.
Sinaysay pa kan PN na record breaking an nasabing numero asin mas halangkaw pa sa 157 vessels na nairehistro puon Setyembre 10 hasta 16.
Kadaklan sa mga barkong Intsik nahihiling sa Ayungin Shoal asin Escoda Shoal. An BRP Sierra Madre nakaduong sa Ayungin Shoal. Kan nakaaging semana hinale kan Philippine Coast Guard an BRP na si Teresa Magbanua sa Escoda Shoal.
Sa ibong kaini, nanindugan si Rear Admiral Roy Vincent Trinidad, tagapagtaram kan Philippine Navy sa WPS na dai ini nangangahulugan na kontrolado na kan Tsina an South China Sea asin ginigibo kan AFP an gabos na mandato kaini nganing protehiran an soberaniya kan nasyon.
