NAGA CITY- Nanutaran an halangkaw na crime incident sa area na kinakaputan kan Police Station 1 asin 3 sa siyudad nin Naga.
Sa nagin paghampang sa mga kagawad kan media ni Naga City Councilor, Omar Buenafe, sinaysay kaini na sa Police Station 1 an pinakahalangkaw na insidente na nairerehistro iyo man an panghahabon.
Ini nin huli sa pigrereport gikan sa mga shopping mall dapit sa mga shoplifter. Mantang sa Police Station 3, halangkaw soboot an crime incidents nin huli ta halawig an sakop na area asin kadakol an populasyon.
Sigun pa ki Buenafe, delikado para sa kapulisan an nasambitan ng area kun kaya pighapot soboot kaini kun posible an pagbugtak nin saro pang Police Station.
Alagad an pagbubugtak man kan Police Station an guided asin igwang limit na anom. Sa ibong kaini, pigtutugutan man an mga substation tanganing mas mabantayan an komunidad.
Katakod digde, pigsaysay man kan opisyal, na nag-deploy nin regular Police Element an Naga City Police Office orog na sa hararayong lokasyon.
Sa presente, pigsierto na sana man ni Buenafe na sufficient an mga kapulisan sa siyudad nin Naga kun kaya dakulang katabangan ini sa pagmantinir kan paz y orden sa bilog na siyudad.
