Pig-aprobaran ni Presidente Ferdinand Marcos Jr. an mas halangkaw na aldawang subsistence allowance para sa mga tauhan kan Armed Forces of the Philippines (AFP) sa P350 gikan sa P150.
Ini man an bisa kan pigtintaan na Executive Order (EO) 84 kan Presidente kan nakalihis na aldaw, Marso 14 na isinapubliko ngunyan na aldaw Sabado, Marso 15. Itataong retroactively an labi sa dobleng paglangkaw nin allowance na P200 sa pagpuon kan Enero 1, 2025.
Nakabugtak kaya sa EO na importante an paglangkaw kan subsistence allowance kan gabos nin mga opisyal asin enlisted personnel kan AFP para sa pagprotekta asin pagbubusol kan saindang ikakamaray komo pagbisto sa saindang mga sakripisyo asin dedikasyon sa pagdepensar asin paninindugan sa soberaniya asin territorial integrity kan nasyon.
Nakapalaman man sa nasambitan Ng Executive Order an presenteng allowance an dae na bastante tangani matustusan an pang uru-aldaw na pangangaipuhan kan mga suldados na yaon sa serbisyo na importante para sa saindang kapakanan asin paggampan kan saindang mga tungkulin.
Huri kaya na nagkaigwa nin adjustment sa nasambitan ng allowance iyo an kan nakalihis pang taong 2015 sa irarom kan Congress Joint Resolution 5 na inisyu sa parehong taon.
Magbebenispisyo man digde an mga trainee asin an mga probationary 2nd lieutenants o ensigns na nagsasairarom sa military training, Military Training cadets na nasa summer camp training asin reserve officers, asin enlisted reservists na nagsasairarom man sa mga trainings asin assembly o mobilization test, Citizen Armed Force Geographical Unit, asin mga kadete.
