Nagpahayag nin pagkahandal si Kabataan Partylist Rep. Raoul Manuel sa halangkaw na viewing sa Pilipinas sa mga PornHub sa internet na labing delikado na takaw tukso sa mga jovenes.
Sa pagdangog kan House Committee on Basic Education and Culture katakod kan pig-iiwalan na implementasyon kan Comprehensive Sexuality Education kan DepEd, ipinunto ni Manuel na kan 2023 an Pilipinas an ika-2 top viewer kan pornHub.
Soboot, an Pilipinas komo sarong sadit na nasyon pa an kabali sa top 5 sa mga mahihilig magdalan sa mga PornHub kun saen an mga aki na dae magagabayan kan saindang mga magurang an magkakaigwa nin kuryosidad digdi na posible nindang arugon asin dae aram an posibleng magin implikasyon.
Mangtang kan 2024, ikatolo man an Pilipinas sa kategorya kan halangkaw an viewership sa Pornhub kun saen an Estados Unidos na sarong dakulang nasyon an nangenot asin panduwa man an France.
Sigun ki Manuel, komo kinatawan kan mga jovenes, labing nakakaalarma kun arog kaini kakuriyat an paggamit kan pornograpiya o pagdadalan kan mga malalaswang tipo kan content sa Pilipinas asin digdi puwedeng masala an mga jovenes kun pan-o ba talaga an tamang pakikipagrelasyon.
Tinawan-duon man ni Manuel na an DepEd an dapat magkaigwa nin sitema tanganing siertohon na an mga Pilipinong estudyante an makakanood nin tunay asin tama tanganing dae mawara an mga ini sa saindang mga kaaraman.
