Iniluwas na kan Hamas an pangaran kan mga masunod na hostages na saindang papalayaon. An mga lalaking sibilyan an binistong sinda Eli Sharabi, 52-anyos; Ohad Ben Ami, 56-anyos asin Or Levy , 34-anyos.
Karibay kan mga nasambitan ng hostages an 183 Palestinian prisoners na kapot kan Israel. Magpuon na ipautob an ceasefire kan nakalihis na Enero 19, igwang nasa 18 hostages na an pigpalaya kan Hamas.
Mantang an Israel igwa man nin 383 na Palestinian prisoners an binutasan.
Sa laog kan tulong semana antes na matapos an enot na yugto kan ceasefire, nagpakawara an Hamas nin 33 hostages asin 1,900 na mga preso.
Sinabi man kan Israel na walo sa mga 33 na hostages an binawian nin buhay. Magpuon an pag-atake kan Hamas sa Israel kan nakalihis na Oktubre 7, 2023 igwang nasa 251 na bihag an kapot ninda asin igwa man nin 1,200 an binawian nin buhay.
Maabot na man sa 47,500 na mga Palestino an nagadan kan Israel sa saindang ginbong opensiba sa Gaza.
Enot ng sinabi kan opisina ni Israeli Prime Minister Benjamin Netanyahu na saindang naresiber an listahan kan mga hostages na papalayaon kun saen inabisuhan na ninda an mga pamilya kan mga ini.
