Pinalaya kan Hamas an apat na hostages na babaeng sundalong Israeli komo karibay kan 200 Palestinian na bilanggo, alinsunod sa sarong ceasefire agreement na obhetong wakasan an 15 bulan na gyera sa Gaza.
An mga suldados an sinda Karina Ariev, Daniella Gilboa, Naama Levy asin man Liri Albag.
An apat na ini an nakatalaga sa sarong observation post sa Gaza asin dinukot kan Hamas fighters kan panahon kan pag-atake kan grupo sa Israel kan nakalihis na October 7, 2023.
Segun pa sa militar, liwat nindang nakaibahan an saindang pamilya asin dinara man sinda sa ospital sa central Israel, susog sa Israeli Health Ministry.
Mientrastanto, bitbit man kan sarong bus an mga Palestinian prisoners paluwas nin Israeli Ofer military prison pagkatapos mapalaya an mga hostage.
Segun sa Prison Service kan Israel, nasa 200 bilanggo an pinalaya. Kabali sa mga ini an mga convicted militants na nagsisirbi nang habangbuhay na sentensiya huli sa saindang pagkaka-imbwelto sa mga pag-atake na nag gadan nin dose-dosenang tao, susog pa sa listahan na pigpaluwas kan Hamas.
Poco mas o menos 70 an ide-deport sa Egypt, 16 an ipinadara sa Gaza asin man an natatadang mga bilanggo an iluluwas sa West Bank, segun sa Palestenian officials.
