eNAGA CITY- Kinumpirmar ngunian kan Philippine National Police (PNP) na saro na namang klase nin iligal na droga an narekober sa kadagatang sakop kan probinsya nin Camarines Norte partikular na sa hampangan kan Calaguas island.
Sa entrevista kan Bombo Radyo Naga ki P/Chief Insp. Marcelito Platino, tagapagtaram kan Quezon Police Provincial Office (QPPO), nilinaw kaini na nakalaog na sa kadagatang sakop kan Camarines Norte an nadukayang 16.5 litro nin liquid cocaine na nasa pangangataman na ngunian kan Provincial Crime Laboratory.
Sigon ki Platino, nagpapataw pataw man sa dagat sa hampangan mismo kan Calaguas island sa banwaan nin Vinzons an nasambitan ng liquid cocaine na napapatos sa sarong container.
Kinakarkulo suboot na maabot sa 13 kilo kun ma-extract asin dagos na magin substance an nasambitan ng substance.
Katakod kaini, mas pinahigot pa kan mga otoridad an pagmomonitor asin pag-iimbestigar katakod sa haros magkakasunod na pagkakarecover kan mga floating substance sa tahaw kan kadagatang sakop kan nasambitan ng mga probinsya.
Kun marurumduman, enot nang narekober an maabot sa 28 bricks of cocaine na nakua kan mga parasira sa boundary kan Quezon asin Bicol na nasundan pa nin kinakarkulong nasa P1.3 million na kantidad nin cocaine na nasubad man sa may Vinzons, Camarines Norte.
