NAGA CITY- Nagpuon na an mininirar komo longest running military parade competition sa bilog na rehiyong Bicol ngunian na aldaw na gigibuhon sa ciudad nin Naga katakod kan Peñafrancia Festival.
Pormal na nagpuon an 9th Bicol Region Military Parade Competition kansubagong alas-7 nin pagka-aga.
Nag-abot sa 697 an kabilugang mga contingents sa nasambitan ng parada na gikan pa sa manlaenlaeng parte kan rehiyong Bicol.
Mas halangkaw an bilang kan mga partisipante ngunian na taon kun ikukumparar ini kan taon 2016 na nag-abot sana sa 646 contingents.
Meintrastanto, gusto man ni Naga City Coun. Lito del Rosario na mapabilang sa Guinness Book of World Record an nasambitan ng parada huli na man sa dakol kan mga nagsasali digdi taun -taon.
Ribu-ribong mga indibidwal an nagsali sa nasambitan ng military parade na gikan sa manlaenlaeng parte kan rehiyon.
Sigon ki Del Rosario, kun makakalaog sa prestihiyosong Guinness Book of World Record an nasambitan ng aktibidad, mas maipapahiling pa sa bilog na kinaban an pagtubod asin pananampalataya kan mga Bicolano ki Nuestra Señora de Peñafrancia.
Katakod kaini, mas mahigot na seguridad an pinaotob ngunian sa bilog na ciudad nin Naga asin ipinapangalad kan mga kapulisan an pagdadara nin backpack, matatarom na bagay asin iba pang mga ipinapangalad na gamit sa mga lugar na aagihan kan nasambitan ng parada.
Matalaga man nin mga pulis asin iba pang mga force multipliers sa palibot kan Plaza Quezon.
Ginibo na man kansuodma an makulay na 2017 Voyadores Festival and Street Dance Competition kun sain nagkampeon digdi an Naga Central School II kontra sa 10 iba pang mga contingents.
