NAGA CITY – Nagtinir sa 3.7% an headline inflation sa Bicol Region. Sa nagin patara-tara ni Ray Merillja, Supervising statistical specialist, officer in charge kan SOCD PSA Bicol, pigsaysay kaini na sa bulan nin Mayo 2024 nagtitinir sa 3.7% an headline inflation o paglangkaw kan presyo kan produkto asin serbisyo sa rehiyong Bicol.
Kan Abril 2024 man, kaparehong porsyento man an nairehistrong headline inflation sa rehiyon mantang 6% man kan Mayo 2023. Sigun ki Merillja, an nagin average kan inflation puon Enero hasta Mayo 2024 an nagpakol sa 3.4%.
Pag-abot man sa lado kan overall inflation kan Mayo 2024, an pangenot na commodity group na nag-ambag an food and nonalcoholic beverages na igwa nin 6.1% na iflation asin 76.5% na share.
Kun saen, kabali digdi, an cereals and cereals products na igwa nin 21.3% inflation partikulamente na digdi an Bagas; meat asin iba pang parte kan hayop an igwa nin 2.2% inflation siringkan karne kan orig; ready-made food asin iba pang food products na igwa nin 5.2% inflation partikulamente na an luya.
Ikaduwa man sa commodity group na igwa nin pinakana-ambag sa pangkagabosan nin inflation kan nakalihis na bulan an transportation na igwa nin 5.5% inflation asin 10.9% share.
Nag-ambag digdi an ibang passengers transport by road na igwa nin 7.2% inflation partikulamente an pamasahe sa tricycle; gasolina na igwa nin 5.2% asin motorsiklo na igwa nin 3% inflation.
Mantang an restaurant asin iba pang serbisyo an ikatolo man sa nag-ambag kun saen nairehistro kaini an nasa 3.9% inflation asin 6.9% share.
Kinababalihan man ini kan restaurant, cafe, asin delight na igwa nin 3.9% inflation. Mientrastanto, duwa man an namantinir an inflation rate kan Mayo kumparar kan Abril sa presenteng taon, ini an Education services na may 3.2% asin financial services na may 0% inflation.
Nakapagkurit man nin mas marekas na paglangkaw kan presyo kan Mayo kumparar kan Abril. Kun saen an clothing and footwear na may 5.4%; housing water, electricity gas and other fuels na igwa nin -3.1%; furnishings, household equipment and written household maintenance inflation 3.7%; health na may 1.5%; transport na may 5%; information and communication na may 4.2%; asin personal care and miscellaneous goods and services na igwa nin 2.9%.
Katakod kaini, an food and non alcoholic beverages na may 6.1%; alcoholic beverages and tubacco na may 4.1%; recreation, sports and culture na igwa nin 3.1%; asin restaurant and accommodation services na igwa nin 3.9% inflation an nagpahiling nin mas maluyang paglangkaw nin presyo kan bulan nin Mayo kumparar kan Abril, 2024.
