(UPDATE) NAGA CITY- Ikinabigla asin ikinamundo kan mismong hepe kan Philippine National Police (PNP) sa ciudad nin Lucena kan maaraman na kabuhan niya an saindang naarestar sa pigkondusir na anti-illegal drug operation sa banwaan nin Pagbilao, Quezon.
Sa entrevista kan Bombo Radyo Naga ki P/Supt. Romulo Albacea, sinaysay kaini na an notoryos drug pusher na si Mary Lee Miralles an target kan saindang buy-bust operation sa nasambitang banwaan makalihis na ibuyagyag kan apat na drug personality na saindang naarestar na digdi sinda nakukua nin iligal na droga.
Dae man suboot ninda nilalaoman na miyembro kan Special Weapons and Tactics (SWAT) kan PNP Lucena City an live in partner ni Miralles na binistong si PO1 Hezri Batilo Jarder, na kabale man sa naarestar sa nasambitang operasyon.
Sigon ki Albacea, haros sarong bulan pa sana na na-assign si Jarder sa SWAT Unit kan PNP Lucena City makalihis na maibalyo ini hale sa second company kan Public Safety Forces na nakabase sa banwaan nin Gumaca.
Kabale man suboot si Jarder sa mga pulis na pigsairarom kadto sa suprise drug test asin mayo sa mga ini an nagpositibo sa paggamit nin iligal na droga.
Dae man pighahale ngonyan kan opisyal an posibilidad na si Jarder an nagseserbeng protektor kan saiyang live-in partner urog pa ta bulto-bultong iligal na droga suboot an pigkukua kaini sa Lucena City asin pigbabagsak sa Pagbilao.
Nahahampang ngonyan sa suruon suon na kasong pagbalgar sa RA 9165 o Comprehensive Dangerous Drugs Act asin attempted homicide an suspek na si Jarder makalihis na pauranan kaini nin bala an bihikulo kan mga operatiba.
Tinawan doon man ni Albacea na dae na ninda tatawan nin pagkakataon na makalusot pa si Jarder sa suruon suon na kasong kinakaatubang kaini.
