Nagresulta sa pagkagadan nin 31 katawo an pag-hijack kan militanteng grupo sa sarong tren sa Pakistan.
Kaibahan sa mga binawian nin buhay iyo an 23 na soldados, 3 railway employee asin 4 na pasahero.
Sa iniluwas na statement kan separatist Baloch Liberation Army na nag-ako kan responsibilidad sa pag-atake, sinaysay kan grupo na nakatakas an saindang fighters kaibahan an 214 pang bihag alagad sainda na soboot in-execute an gabos kan mga ini nin mayong pigtataong anuman na ebidensiya tanganing patotoohan ini.
Enot digde, sinalakay kan mga militante an Jaffar Express sa remote mountain pass sa Balochistan province, pinasabog an mga riles kan tren sa pag-atake saka binihag an mga pasahero sa sarong aldaw na standoff.
Sigun ki Army spokesperson Ahmed Sharif Chaudhry, nagadan kan mga soldados an 33 insurgents asin nasalbar an 354 na mga bihag.
Mayo man soboot indikasyon na igwang kinuang ibang bihag an grupo gikan sa pinangyarihan kan krimen.
Pigbuyagyag man kan Army official na igwang ebidensiyang pigsusuportaran kan India asin Afghanistan an nasambitan ng mga insurgent, bagay na kapwa man pigpahimutikan kan 2 nasyon.
An Baloch Liberation Army an pinakadakula asin pinakamakusog gikan sa mga katutubong Baloch insurgent groups na pirang dekada nang nakikipaglaban tanganing maabot an kasarinlan kan Balochistan province na mayaman sa mineral asin lugar para sa darakulang proyektong pinapangenotan kan China kaibahan an pantalan asin minahan kan ginto asin tanso.
