Iginigiit ni Senador Risa Hontiveros na dai dapat magin awkward an pag-atendir ni Bise Presidente Sara Duterte sa plenary deliberations kan Senado para sa 2027 budget kan Office of the Vice President (OVP).
Inaasahan ni Hontiveros na personal na mahaharap an Bise Presidente, arog kan ibang pamayo nin ahensya, tanganing depensahan an saindang kahagadan nin pondo.
Dai nag-atendir si VP Duterte sa hearing kan Senate Finance Subcommittee kan Oktubre 20, kun sain inaprubaran sa committee level an P785.2-milyon na budget kan OVP, asin an saiyang Chief of Staff an nagrepresentar.
Nagpahayag man si Senate President Sherwin Gatchalian nin paglaom na mahaharap si VP Duterte sa plenaryo, huli ta nakaugalian na sa mga pamayo nin ahensya na personal na depensahan an saindang proposed budget.
Nagpatanid si Hontiveros na kun dai na naman maaatendir an Bise Presidente, irerekord ini bilang bakong tamang gawe para sa sarong pamayo nin ahensya na dai magharapan sa Kongreso manungod sa pondo na hinahagad.
Lininaw niya na an pag-atendir sa budget deliberations dai makakabari sa sub judice rule, huli ta ini suway na proseso sa arin man na impeachment proceedings.
Idinugang kan senadora na obligasyon kan Kongreso na busisihon an budget kan lambang ahensya, huli ta an pondo kan gobyerno hale sa kwarta kan banwaan.
