Nagkumpirma an Hostile witness dating Office of the Vice President (OVP) Special Disbursing Officer (SDO) Gina Acosta sa saiyang opisyal na testimonya na si VP Sara Duterte an nagsugo saiya na itao an ₱125 million confidential funds ki Col. Raymund Dante Lachica.
Ginibo ni Acosta an rebelasyon na ini sa atubangan kan Senate Impeachment Court kan ika-16 na aldaw kan impeachment trial ni VP Sara.
Sinabi ni Acosta sa saiyang testimonya na pagkatapos niyang i-cash o ibalyo an confidential funds check, inapod niya tulos si Col. Lachica.
Kan hinapot kun tano ta ginibo niya ini, an sadiri niyang pahayag iyo ini: “Ang nag-utos po sa akin na i-release ang pera na ₱125M sa security officer na si Colonel Lachica ay si Ma’am Sara Duterte.”
Si Col. Lachica iyo kaidto an pamayo kan Vice Presidential Security and Protection Group (VPSPG).
Duwang rason man an sinabi ni Acosta kun tano ta itinao niya an confidential funds ki Col. Enot, huli ta si VP Sara an nagboot kaini bilang Head of Agency asin ikaduwa, si Lachica an eksperto na nag-iimplementar kan confidential operations kan OVP.
Naghapot si Trial Presiding Officer Francis “Chiz” Escudero kun trabaho kan security officer na gastuson an confidential funds na ipinaluwas ni Acosta bilang special disbursing officer.
Nagsimbag si Acosta na “dai” huli ta trabaho ini kan SDO alagad pag-release na kan kwarta, trabaho na kan security officer na magsumiter nin utilization report bilang patunay na ipinaotob an mga confidential activities.
Mientrastanto, pigsugo ni Trial Presiding Officer Francis “Chiz Escudero si Acosta na bumalik saaga, Agosto 18 tanganing magtestigo giraray sa irarom kan parehong subpoena.
