Nagpaluwas nin mga subpoena an House Committee on Justice laban sa Bureau of Internal Revenue (BIR) asin Securities and Exchange Commission (SEC) bilang parte kan mas hararom na imbestigasyon sa suboot dai maipaliwanag na yaman asin financial irregularities ni Bise Presidente Sara Duterte.
Durante kan impeachment hearing kan Justice panel kasubagong aldaw, sa pangengenotan ni Batangas Rep. Gerville “Jinky Bitrics” Luistro, an hearing pinag-olayan an mga mosyon na naghahagad nin mga crucial financial documents na may relasyon ki Duterte, sa saiyang agom na si Manases “Mans” Carpio, asin sa saindang mga negosyo.
Bicol Saro Party-list Rep. Terry Ridon nagsangat nin mosyon na magpaluwas nin subpoena ad testificandum asin duces tecum laban sa sarong representante kan BIR.
Obheto kaini na makua an tax records ni Duterte asin Carpio, kaiba na an mga companies na may relasyon sa sainda.
Kabali sa mga hinahagad na dokumento an mga rekord kan “tax compliance and reported income,” kabali an orihinal o sertipikadong kopya kan income tax returns, value-added tax payments, asin iba pang related records puon 2007 sagkod 2025 para ki Duterte asin Carpio, siring man mga dokumento kan nagkapirang korporasyon na saindang kinabibilangan.
An mosyon na suportado ni ML Party-list Rep. Leila de Lima, inaprobaran sa boto na 34-2 na mayong nag-absten. Pinagbotan ni Luistro an komitiba na tulos na ipaluwas an katumbas na subpoena.
Susog ki Ridon, an lakdang nagtutumong na ma-assess an mga posibleng pagkakaiba sa pag-ultanan kan mga idineklarar na mga pagsadiri asin aktuwal na kita, asin tanganing mag-focus giraray sa isyu kan mga Statements of Assets, Liabilities and Net Worth (SALN) asin soboot dai maipaliwanag na kayamanan.
Sa sarong separadong mosyon, inaprobaran man kan komite an pagpaluwas nin sarong subpoena laban sa SEC tanganing makakua nin mga sertipikadong kopya kan mga general information sheets asin audited financial statements kan duwang kumpanya na nasambit sa hearing.
An mosyon laban sa SEC, na isinangat man ni Ridon, inaprobaran nin 14 na pabor, duwa an nagkokontra, asin tolo an abstain.
An mga lakdang nagpapahiling kan pinakusog na pagtipon nin ebidensya sa mga prosedimiento sa impeachment, kun saen an mga mambabatas naghihingoang mamidbid an mga dalagan pinansyal na pwedeng magpatunay sa mga alegasyon nin dai maipaliwanag na kayamanan asin mga pagbalga sa paninimbagan kan publiko.
