Suportado ni House Speaker Faustino “Bojie” Dy an pangapudan ni Presidente Ferdinand Marcos Jr. na makipagtabangan asin sumuko an gabos nin imbwelto sa flood control anomaly.
Sa sarong statement, ipinagirumdom kan lider kan Kamara na igwang paninimbagan sa ley an siisay man na nag uulang sa pag-usad kan nasambitan ng lakdang.
Iginagalang man kaini an nagin lakdang kan Independent Commission for Infrastructure (ICI) asin Department of Public Works and Highways (DPWH) na pagdulok sa Office of the Ombudsman.
Nagtutubod man si Dy sa kakayahan kan ICI na gampanan an mandato kaini, rason kaya dae na soboot pigdagos pa kan Kamara an kaparehas na imbestigasyon tangani pabayaan na an komisyon na makapagtrabaho nin dagos-dagos.
Sinegundahan man kan House Speaker an pahayag kan Presidente na ano man na posibleng kaso an dapat nakabase sa kabilugang ebidensiya asin dapat na magsimbag an Ombudsman sa direksiyong tinutumbok kaini huli ta an ebidensiya soboot an dapat na magin basehan sa paninimbagan.
Sa huri, pighurot kan House Speaker na nagtitinir an saindang paninindugan na igalang an proseso asin suportaran an mga institusyong may tungkulin na aramon an bilog na katotohanan tangani mapanimbag an dapat na manimbag asin makua an tunay na hustisiya para sa kahimanwang Pinoy.
Sa ngunyan, sigun sa Presidente, nasa pito na sa may warrant of arrest katakod sa flood control anomaly an naarestar na, duwa an preparadong sumuko asin pito pa an nagtitinir na at large kabali na si dating Cong. Zaldy Co.
