Papangenotan kan Tri-committee kan House of Representatives an pagkakasar kan imbestigasyon katakod sa soboot mga anomalya sa flood control projects sa bilog na nasyon.
An tri-committee an kinababalihan kan Committee on public accounts, public works and good government.
Sigun ki Bicol Saro party-list Rep. Terry Ridon, pighahalat pa nindang makumpleto an mga miyembro kan nasambitan ng mga komite.
Apwera digde, pighahalat pa kan Mababang Kapulungan an bilog na listahan kan mga proyektong imprastraktura na piglalaomang isusumiter kan epartment of Public Works and Highways (DPWH) ki Presidente Ferdinand Marcos Jr.
Saysay pa kan lehislador na sakop sa imbestigasyon bako sana an mga nakumpletong mga proyekto kundi magin an mga dae pa natatapos, napapauktaba, substandard asin ghost o dae nagi-exist na mga proyekto.
Pag-abot man sa mga akusasyon kan korapsiyon na pigkaka-imbweltuhan soboot kan mga lehislador, pighurot ni Rep. Ridon na an responsibilidad tanganing magpresentar kan konkretong ebidensiya an nakasalalay sa mga indibidwal na naggagapo kan akusasyon.
Pigkumpirmar man ni Ridon na pig-imbitaran sinda Senator Panfilo “Ping” Lacson asin Baguio City Mayor Benjamin Magalong na kapwa nagbuyagyag kan soboot korapsiyon sa infrastructure projects.
