Kinumpirma kan Iran-aligned Houthi group sa Yemen na saindang inatake an Jazan refinery kan Saudi Aramco kaining Domingo, pirang aldaw makalihis pumirma an Saudi Arabia sa sarong defense pact kaiba an Turkey asin Pakistan.
Segun sa Houthi military spokesperson na si Yahya Saree, gumamit sinda nin drone tanganing targeton an refinery sa Jazan, southwestern Saudi Arabia.
Segun man sa Saudi Energy Ministry na nagkaigwa nin sulo sa refinery alagad tulos ining naapula. Mayo mang nairehistro na irido.
An Jazan refinery ay may kapasidad na magproseso nin hasta 400,000 barrels kan crude oil kada aldaw asin dati na mang naging target kan mga pag-atake an mga nasambitang rebeldeng grupo.
Bukod sa Saudi Arabia, sinabi man ng Houthis na nagsagibo man sinda nin missile asin drone attacks kontra sa Mocha, sarong Yemeni Red Sea port city.
Segun sa report kan Reuters, pinapaputukan kan air defenses an mga drone na target suboot an commercial quay asin storage facilities kan port.
Sinabi ni Saree na target ninda an mga sundalong Saudi asin weapons arsenal sa lugar.
Susog sa Yemeni military spokesperson, pitong katawo an nagadan sa pag-atake.
Sinabi kan Yemeni Transportation Ministry na malala man an danyos sa imprastraktura kan port.
Nainot nang nagdeklara an Houthis nin naval blockade kontra sa Saudi Arabia sa Red Sea, na inatatakod ninda sa sinasabing blockade kan Riyadh kontra sa sainda na tig ninigar man kan Saudi government.
Duwang aldaw bago an insidente, nagpirma an Saudi Arabia sa sarong defense agreement kaiba an Turkey asin Pakistan komo tugon sa naglalalang regional instability huli sa digmaan sa pag ultanan kan US, Israel asin Iran.
Nakatalaan sa kasunduan na an armadong pag-atake kontra sa arinman sa tulong bansa ay tuturingon na pag-atake kontra sa gabos.
Dae pa malinaw kun makikiayon o papano matugin an Turkey asin Pakistan sakaling magsagibo an Saudi Arabia nin lakbang kontra sa mga bagong pag-atake kan Houthis.
Sinabi man ni Turkish Foreign Minister Hakan Fidan na dae nakatuon an defense pact kontra sa Iran o anumang partikular na bansa. Suboot, saro ining pang gabusan na suportahan sa seguridad kan tulong magkakaalyadong bansa.
