NAGA CITY- Nag-abot sa kabilugang 2,949 na an bagong nagparehistro para sa Barangay asin Sangguniang Kabataan election sa siyudad nin Naga.
Sa nagin paghampang sa mga kagawad kan media ni Atty. Maico Julia Jr, Election Officer kan Comelec Naga, sinaysay kaini na an nasambitan ng numero an puon August 1 hasta August 10, 2025.
Sigun sa opisyal, kasuudma, nagpakol sa 657 an naidugang sa mga bagong registrant para sa huring aldaw kan voter’s registration.
Inabot nin hasta alas 11 nin bangi an registration nin huli ta kaipuhan tapuson an gabos na nakalista asin nakalaog sa pigtalaan na oras kan komisyon.
Dugang pa ni Julia, kadaklan sa saindang nareseber na aplikasyon iyo an registration, re-activation asin correction.
Mientrastanto, enkaso man na madagos an Barangay asin Sangguniang Kabataan election sa December, isasagibo man sa October an filing kan COC kan mga kandidato mantang para man sa bulan nin Nobyembre ini an para sa campaign period asin sa December 1 isasagibo an mismong borotohan.
Alagad enkaso na dae madagos an eleksyon, yaon pa man giraray an preparasyon kan komisyon para sa masunod na taon.
Sa ngunyan, nagpasalamat na sana si Julia sa mga nakisumaro tanganing magin matrayumpo an nasambitan ng voter’s registration.
