NAGA CITY- Arestado kan mga otoridad an saro na naman na high value target na incumbent barangay kagawad asin sarong drug pusher makalihis an pigkodusir na anti-illegal drug operations sa Bombon, Camarines Sur.
Sigon ki PO2 Marian Peñas, hale sa PNP Bombon, sinaysay kaini na naarestar an mga suspek na sinda incumbent barangay kagawad Joel Morales asin Marcel German sa pigserbeng search warrant sa saindang mga harong sa barangay San Antonio.
Nakumpiskar ki Morales an sampulong sachet nin pigtutubudang shabu asin mga drug paraphernalia mantang nasamsam man ki German an mga bala kan badil, sampulong sachet nin shabu asin mga drug paraphernalia.
Sigon ki Peñas, haloy na nindang monimonitor an duwang suspek na nagbebenta suboot nin iligal na droga sa banwaan nin Bombon asin sa Calabanga.
Enot pa kaini, nagsuko sa programang Oplan Tokhang an nasambitang barangay kagawad alagad dae man suboot ini nakipagtabangan sa kampanya laban sa iligal na droga kan gobyerno.
Mientrastanto, sigon man ki Jeffrey Morales, tugang kan suspek, sinaysay kaini na mayong naipahiling na search warrant an mga kapulisan antes an nasambitang operasyon.
Dae man suboot pagsasadiri kan suspek an shorts kun saen nakua kan mga kapulisan an sachet kan pigtutubudang shabu.
