NAGA CITY — Gadan an sarong drug personality mantang lugadan an apat na pulis makalihis na mapuli sa shootout an buy-bust operation sa Doña Margarita Subd., Brgy. Malabanban Norte, Candelaria, Quezon.
Sa impormasyong ipinaabot kan Quezon Provincial Police, target talaga kan mga otoridad sa nasambitan ng operasyon an mga drug personalities na sinda Eduardo Magtibay, 49-anyos asin si Velmar Antonio, 40-anyos. Alagad makalihis makumpiskar sa mga suspek an mga pinagtutubudang shabu, nagdulag an mga ini palaog sa sarong harong.
Pigporbaran kan mga pulis na laugon ini alagad nagpuon nang magpaputok si Magtibay na nagresulta sa pagkairido ninda SPO1 Alnor Tagaraon na natamaan sa toong kamot, PO2 Renante Barros na may tama man sa walang abaga, PO2 Arnel Valdepena na nalugadan sa walang tuhod asin walang bitis mantang sa parehong tuhod man an tama ninda PO1 Jan Ryan Andaya.
Digdi na nagpuon an riribayan nin putok sa pagultanan kan duwang lado na nagresulta sa pagkagadan ki Magtibay.
Idinalagan kuta na ini sa ospital alagad idineklarang dead on arrival kan mga doktor.
Nakumpiskar sa mga suspect an anom na pakete kan pinagtutubudang shabu, P500 na marked money, hand grenade asin sarong calibre 45 badil.
Mientrastanto, dinara man sa ospital an mga nalugadang pulis mantang nakakulong na si Antonio ngani na kahampangon an kasong pagbalgar sa Republic Act 9165 o an Comprehensive Dangerous Drugs Act asin RA 10591 o Illegal Possession of Firearms.
