NAGA CITY- Pigpaliwanag kan sarong ICC Accredited Lawyer na mayo na soboot magiginibo an Korte Suprema tanganing maibwelta si dating Presidente Rodrigo Duterte sa nasyon.
Sa entrevista kan Bombo Radyo Naga ki Atty. Gilbert Andres, ICC Accredited Lawyer, Executive Director of Center for International Law, sinaysay kaini na huli ta nasa luwas na kan Pilipinas an dating Presidente makalihis na arestuhon magigin useless na an remedy o doktrina na gigibuhon kan Supreme Court.
Sigun pa ki Andres, mayong kapangyarihan an Supreme Court na suguon an International Criminal Court na ibalik si Duterte orog na ta maikokonsederar man na legal an pag-aresto sa dating Presidente.
Dugang pa kan abogado, kaipuhan na implementable an lakdang na gigibuhon kan Supreme Court huli ta kun dae ini an madi-dismiss man sana.
Mientrastanto, liwat man na pigtawan duo kan ICC Accredited Lawyer na legal an pag-aresto ki dating Presidente Duterte nin huli ta binasehan soboot kan gobierno kan nasyon an Domestic Law sa irarom kan Republic Act 9851 Section 17.
Sa nasambitan ng batas nakapalaog na an mga otoridad an pwedeng magsuko o mag-extradite kan suspected o accused na indibwal sa Pilipinas sa magkakanigong international court susog sa applicable na extradition laws asin treaties.
Boot sabihon pwedeng i-surrender kan mga otoridad sa Pilipinas an siisay man na tawo na pighahabol kan batas.
Paliwanag pa ni Andres, maski nagkalas na an nasyon sa ICC sa panahon ni dating Presidente Duterte, dae soboot maihahali na nagin state party kan ICC an Pilipinas asin sakop pa kaini an mga soboot krimen na nangyari.
Sa ibong na lado, sa pre-trial na pigkundusir kan ICC gabos man an nasunod asin naipaliwanag nin marhay ki Duterte an saiyang mga derechos.
Sa ngunyan, nagtutubod si Andres na bastante naman an panahon na pigtao kan ICC sa dating Presidente tanganing magkaigwa ini nin oras tanganing depensaran an sadiri kontra sa kasong Crime Against Humanity.
