Pigtalga kan International Criminal Court (ICC) si Judge Joanna Korner komo presiding judge kan Trial Chamber III na iyo an maasikaso kan crimes against humanity case laban ki dating Presidente Rodrigo Duterte katakod kan saiyang kampanya kontra iligal na droga.
Sa sarong dokumento na may petsang Abril 29, an ICC Trial Chamber III nagkumpirma na si Korner an napili na mangenot sa tolong huwes na panel.
An desisyon nangyari pirang aldaw pagkatapos na an ICC Presidency nagbilog kan trial chamber kan Abril 24.
An Trial Chamber III binibilog ni Korner, Judge Keebong Paek, asin Judge Nicolas Guillou, asin pormal na pigbilog kan Abril 24 kan ICC Presidency tanganing dangugon an kaso laban sa dating presidente.
Si Judge Korner sarong beteranong huwes na Briton na may labing 45 taon na eksperyensya sa larangan nin ley kriminal. Naglaog siya sa ICC Trial Division kan Marso 2021 asin matinir duman sagkod 2030.
Bago mag’ayon sa ICC, nagserbi siyang huwes sa Crown Court of England asin Wales, kun saen nag-asikaso siya nin mga kasong kriminal arog kan paggadan asin pandadaya. Nagserbi man siya bilang halangkaw na piskal sa International Criminal Tribunal para sa dating Yugoslavia.
Kan 2004, tinawan siya nin Companion of the Order of St. Michael and St. George (CMG) bilang pagmidbid sa saiyang mga serbisyo sa ley internasyunal.
An pagbilog kan Trial Chamber III asin an pagnombrar nin presiding judge iyo an pigkokonsiderar na importanteng lakdang sa pagsulong kan kaso laban ki Duterte sa irarom kan prosidimiento kan ICC.
