NAGA CITY- Saro na naman na engkwentro sa pag-ultanan kan tropa kan gobyerno asin an mga pigtutubudang miyembros kan rebeldeng New People’s Army (NPA) an nairehistro sa banwaan nin Lagonoy, Camarines Sur subagong aga.
Sa entrevista kan Bombo Radyo Naga ki 1Lt. James Limos, hale sa 83rd Infantry Battalion kan 9th Infantry Division, Philippine Army, sinaysay kaini na alas-8:25 nin aga subago kan mangyari an bakbakan sa pag-ultanan kan mga soldados hale sa 93rd Division Reconnaissance Company asin mga rebelde sa barangay Pinamihagan sa nasambitang banwaan.
Naghaloy suboot nin haros 15 minutos an riribayan nin putok sa pag-ultanan kan duwang grupo na nagresulta sa pagkakarekober kan sarong landmine, medical kit, duwang bag, apat na mga cellphone asin subersibong dokomento na pagsasadiri suboot kan mga rebelde.
Ini an ikatolong engkwentrong nairehistro sa probinsya ngonyan sanang semana.
Marurumduman na kan aldaw nin Lunes kan mangyari man an bakbakan sa pag-ultanan kan mga soldados asin NPA sa parehong banwaan na nagresulta sa pagkagadan kan saro pa na pigtutubudang rebelde.
Mientrastanto, suodma man kan nangyari an saro pa na engkwentro sa banwaan nin Bato sa parehong probinsya na nagresulta sa pagkagadan kan tolong mga pigtutubudang NPA asin pagkakaarestar kan lima pang mga personalidad.
