Dapat nang tapuson kan Senate Blue Ribbon Committee asin ipaubaya sa Independent Commission for Infrastructure (ICI) an imbestigasyon katakod sa maanomalyang flood control projects, sigun ki Senator Erwin Tulfo.
Hurot ni Tulfo, garo nagigin telenovela na kaya asin orog pang nagugulo an imbestigasyon.
Kaya man mas marhay soboot na ipaubaya na sana sa ICI an isyu kan flood control tanganing matutukan an ibang isyu kaibahan an smuggling asin online gambling.
Malinaw kaya soboot na napag-ulayan na a oras na igwang nagsunad nin kaso, an uuntukon na ka Senado an pagdangog asin matutok na sa pagbilog kan committee report.
Suhestiyon kan senador, imbes na magsabay-sabay an mga ahensiya kan gobyerno sa pag-iimbestigar katakod sa maanomalyang flood control proects, itao na sana an gabos kan ebidensiya sa ICI.
Dugang pa kan senador, nasa kamot na kan komisyon kun ila-livestream ninda an pagdangog gayong ini an pighahalat kan taumbayan.
Mientrastanto, pighurot man ni Senate Blue Ribbon Committee Chairman Senador Ping Lacson na mapadagos pa an imbestigasyon kan komite dapit sa flood control anomalies.
Alagad sigun sa saiya, masumiter na sinda nin initial committee report gikan sa mga nakalihis na pagdangog asin maisponsoran na ini pagkatapos kan budget debates.
Sa ngunyan, mayo pang nakatalaang iskedyul kan masunod na hearing huli ta nagpapadagos pa an deliberasyon dapit sa prosopwestong pambansang pondo para sa 2026.
