Pigbatikos ni Senate President Pro Tempore Panfilo “Ping” Lacson an mga alegasyon ni Senator Imee Marcos sa 2026 General Appropriations Act (GAA), kun saen igwa man soboot allocable funds sa 2025 budget an senadora basado sa impormasyon gikan sa ‘Cabral files’.
Sigun ki Lacson, mayong moral ascendency si Marcos sa pagpupuna kaini sa napirmahang budget kan 2026, kun ini mismo igwa man pork barrel o insertion sa 2025 national budget na nagpakol sa P2.5 o P3.5 bilyon.
Pigkuwestiyon man kan senador kun tano pighayag ni Marcos an saiyang mga alegasyon sa Bicameral Conference Committee.
Mantang pinabulaanan man kaini na mayong nagpupugol sa mga sendor na parte kan Senate Blue Ribbon Committee na magtaram dapit sa mga opisyal kan gobierno na sangkot sa flood control projects scandal.
Katakod kan pagpuna kan senadora kun tano dae pigdagos an pagiimbestiga ki House Speaker Martin Romualdez.
Paliwanag ni Lacson, mayong sapat na ebidensya na nagpapatotoo na sangkot si Romualdez sa soboot anomalya sa flood control projects.
Kung saen pigtawan duon kaini na nagpapadagos an imbestigasyon basado sa mga ebidensyang saindang nakakalap.
Marurumduman na pigakusaran ni Senator Imee an 2026 GAA na soboot sarong political budget asin bako para sa ikakauswag kan nasyon.
Sinaysay man kaini na pigbanga an pondo para sa pagsasagibo nin planong impeachment ki Vice President Sara Duterte, katakod kan posibleng pagsunad nin bagong reklamo sa Prebrero, makalihis an sarong taong pagbabawal sa pagsunad nin impeachment complaint.
Mientrastanto, pigtawan duon man ni Marcos na an soboot “soft pork” sa 2026 budget pupwedeng gikan sa tabang pinansyal kan gobyerno sa paagi kan mga programa siring kan Medical Assistance to Indigent and Financially Incapacited Patients (MAIFIP) asin Assistance to Individuals in Crisis Situations (AICS) .
Sa huri, pig-eenkaminar ni Lacson si Marcos na mag-atendir sa Senate Blue Ribbon Committee asin iluwas an gabos kan ebidensya na igwa ini kasabay kan pagsierto sa senadora na tatawan kaini nin sapat na oras kun kinakaipuhan.
