Liwat na pighurot kan mga lideres kan Kamara na mayo sa agenda kan Kamara an pagsangat nin impeachment complaint kontra ki Bise Presidente Sara Duterte.
Ini an pigduon ni Senior Deputy Speaker Aurelio “Dong” Gonzales Jr., Deputy Speaker David “Jay-Jay” Suarez, asin House Majority Leader Manuel Jose “Mannix” Dalipe kasunod kan pag-init kan urulay manungod sa posibleng pagsangat nin reklamo sa impeachment laban ki Duterte na pahalion siya sa pwesto makalihis an pagbabanta ki Presidente Ferdinand Marcos Jr.
Tinawan duon ni Gonzales, Suarez asin Dalipe na dawa ngani seryoso an Kamara sa pagkaigwa nin transparency asin accountability sa gobyerno, an mga imbestigasyon kan mga komite kaini sinasabing nakasentro sa paghanap kan katotoohan.
Sa irarom kan Konstitusyon, an siisay man na Pilipino pwedeng magsangat nin impeachment complaint kontra sa siisay man na pwedeng i-impeach na opisyal kan gobyerno.
Alagad, an petisyon dapat na inendorso kan sarong miyembro kan Kamara tanganing ini maaksyonan kan Kamara.
An mga patakaran kan Kamara sa impeachment nagbubugtak kan proseso asin mga timeline para sa pagkonsiderar asin paghiro sa sarong reklamo sa impeachment.
An impeachment petition na pinirmahan kan dai mababa sa un-tersio kan gabos na miyembro kan Kamara pwedeng tulos na i-refer sa Senado para sa pagbista.
