Nanindugan si Presidente Ferdinand Marcos Jr. na dae ini an tamang panahon tangani ibusol an impeachment complaint kontra ki Vice President Sara Duterte.
Ini an nagin kasimbagan kan Presidente para sa saiyang reaksyon dapit sa opinyon ni Chief Presidential Legal Counsel Juan Ponce Enrile manungod sa posibleng magin precedent enkaso na dae tinugutan na mag gana an nakabugtak sa Saligang Batas katakod kan mga pigbubusol na impeachment complaint sa Bise Presidente.
Alagad tulos man na pighurot kan Presidente na dae ini an tamang panahon para tutukan an pagpapasikad ki Duterte.
Para saiya, best legal thinkers sa nasyon si Enrile asin totoo man an obserbasyon kaini na mandato kan Kamara asin Senado na dingugon an mga reklamong impeachment laban ki Duterte.
Siringpaman, sinabi kan Pesidente na para sa saiya, bako ini an tamang panahon. Pigpunto kaini na malaog an nasyon sa panahon kan kampanya para sa 2025 midterm elections sa Mayo.
Buot sabihon na mayong panahon na an mga kongresista asin senador na matutok tangani simbagan an mga reklamong impeachment nin huli ta sigurado soboot mangangampanya na an mga ini. Siguradong dae na makakabilog pa nin quorum tangani dangugon an mga reklamo kaya man malabo maaksyunan ini.
