Madagos pa man giraray an impeachment trial ki Vice President Sara Duterte dawa na imbitaran enkaso kan International Criminal Court (ICC) sa saindang imbestigasyon katakod sa war on drugs kan saiyang ama na si dating Presidente Rodrigo Duterte.
Ini an pighurot kan saro sa mga House prosecutors para sa impeachment trial ni VP Sara na si Manila Rep. Joel Chua sa sarong press conference ngunyan na aldaw nin Lunes, Marso 10.
Alagad pig-amin kan lehislador na posibleng mauktaba an trial enkaso kabali an Bise Presidente sa posibleng warrant of arrest kan ICC asin man enkaso dadarahon sa The Hague, Netherlands kun saen nakabase an ICC sa oras na maipautob ini.
Ginibo kan lehislador an pahayag sa tahaw kan mga alingasngas katakod sa posibleng pagluluwas nin arrest warrant kan ICC kontra sa dating Presidente na kun saen si VP Sara an saro sa respondents sa kaso.
Inihayag man ni Chua na bakong kawaran si dating Presidente Rodrigo Duterte na naenot ng nagpresenta na magin abogado kan saiyang aki sa impeachment trial, kun enkaso maipautob an warrant gikan sa ICC. Pag abot man ki VP Sara, sinabi ni Cong. Chua na enkaso man dae available si VP Sara para sa impeachment trial, pwedeng hagadan nin judicial affidavit an saiyang kampo.
Mientrastanto, pigbuyagyag man kan lehislador na nakatalaan na mag-convene an mga miyembro kan House prosecutor panel ngunyan na aldaw, Marso 11 tangani pag ulayan an saindang mga plano enkaso kaipuhan an presensiya ni VP Sara sa The Hague.
Sa lado man ni VP Sara, naenot na kaining pig sayumahan sa sarong pahayag kan nakalihis na Pebrero 2024 an pagkaka imbwelto sa soboot extrajudicial killings katakod sa drug war kan saiyang ama asin man pighamon an mga naga-akusa sa saiya na magdemanda nin murder.
Ini an kasunod kan rebelasyon ni self-confessed Davao Death Squad (DDS) hitman asin retired Philippine police officer Arturo Lascañas na naga-akusar ki VP Sara na nagsugo soboot sa umano sa law enforcement officials tangani dukuton asin man ilubong an mga drug suspect asin man paluwason an mga ini komo kidnapping case kan ini ay alkalde pa sana kan Davao kan nakalihis na taong 2012
